黎小田（Michael）一連兩場嘅《小田金曲50年作品演唱會》噚晚大年初二喺紅館演出，表演嘉賓眾多包括柳影虹、葉振棠、黎瑞恩、胡渭康、林利、陳曉東、湯寶如、吳浩康、衛蘭、衛詩、王馨平、薛家燕等廿幾位歌手。因應本來舉行嘅賀歲煙花，演出延至9點半開場，大會喺開場前透過螢幕呼籲觀眾為早前大埔巴士車禍死者默哀一分鐘。
着住紅色唐裝彈住鋼琴出場嘅主角黎小田先開金口唱出一段《大地恩情》後，再同大家打招呼：「恭喜發財！多謝大家年初二嚟紅館睇我演唱會。」然後就到嘉賓們輪流上台獻唱，其中柳影虹唱完歌後仲喊住口單膝下跪多謝黎小田：「感激Michael哥畀好多機會新人，畀咗好多主題曲同插曲我唱，所以我要半跪你！我好恨嚟你演唱會，終於喺我62歲嘅今年恨到。」
而湯寶如（湯記）演唱完梅艷芳嘅《似火探戈》後，就同Michael講有味笑話，湯記首先問Michael敲緊咩樂器，Michael話自己「扑」木魚，湯記就話：「唔明點解男人咁鍾意講呢啲「扑」呀，係敲呀。」
然後湯記又向Michael講：「希望今年你同家燕姐可以拉埋天窗。」Michael聽到後即刻口窒窒話：「咩呀？」湯記再講：「你同家燕姐嗰啲眉來眼去我睇到，我o依家先爆你大鑊。」Michael最後話：「女仔講埋啲咁嘅嘢。」
壓軸嘉賓係着住桃紅色露肩長裙嘅薛家燕，咬住玫瑰花上台嘅Michael仲半跪送花俾家燕姐，兩個人喺台上打情罵俏，家燕姐先讚Michael後生時好靚仔：「我同黎小田都係童星，佢真係靚仔又有型，點知有一日我見到佢做消防員救火，向啲螞蟻屙尿，點解呀？」Michael話：「因為嗰時拍嘢導演叫cut，我見有啲螞蟻，所以咪咁。」
家燕姐然後接連唱出《家燕與小田》同《心肝寶貝》，Michael仲錫家燕姐面珠，然後話：「其實你離婚之後我追過你一輪。」家燕姐話：「我記得，你嗰陣見到我，話『早知嫁畀我啦』，我都唔知笑定嬲好，你話會照顧我。」Michael再話：「後尾我諗諗吓，你褦住三件喎。」家燕姐就講：「咁點照顧我？」
演唱會尾段眾歌手再上台合唱最後一曲《問我》，完場時家燕姐等人喺台中央升降台準備降落台底，企在台邊嘅Michael有一隻腳踏空一度失平衡，升降台立即暫停下降。工作人員即刻衝上前協助並扶住Michael行落台，有驚無險。
 (攝影：仇志德、馮嘉銘) |  家燕姐然後接連唱出《家燕與小田》同《心肝寶貝》 |  |
 |  |  |
 Michael講有味笑話 |  |  黎小田公開調情喎！ |
 |
