初三赤口，梁朝偉唔會口窒窒，仲同大家嚟個快問快答，祝大家囗齒伶俐。今個新歲，偉仔同另一半劉嘉玲分別有賀歲片《捉妖記2》同《我的情敵女婿》上映，而且齊齊喺香港同心愛寶貝狗狗度新歲，原來偉仔最鍾意食嘅賀年食物係蘿蔔糕，不過賀年糕點食得多好易肥，所以偉仔笑話，如果可以成為一隻妖，自己會揀做一個唔會肥嘅妖。
偉仔喺《捉妖記2》入面，對手係胡巴同笨笨，如果二揀一，偉仔就鍾意笨笨多啲，因為覺得笨笨面懵心精。講到演出時要對住空氣做對手戲，問到偉仔有咩感覺？佢笑話：「覺得自己好儍！」
偉仔仲話自己選擇拍賀歲片，首要元素係要有歡樂，其實今個新年上映嘅電影，除咗歡樂，亦好多元化，好似嘉玲嘅賀歲片《我的情敵女婿》齊齊上映中，票房都唔錯，尤其係偉仔嘅《捉妖記2》年初一上映，單日已過280萬票房，上映兩天票房已過500萬，目前成為賀歲片票房三甲之內，截至今日四點單日票房已過130萬。至於黃子華主演嘅《棟篤特工》，單日票房就過咗300萬，只係差《黑豹》廿萬左右，走勢依然強勁。
 偉仔話鍾意《捉妖記2》嘅笨笨，話係面懵心精。 |  |  偉仔同嘉玲各自都有主演嘅賀歲電影，台下一團和氣抱住狗狗拜年。 |
 |
