今日係初三赤口，傳統不宜拜年，原來赤口又名「赤狗日」，傳說赤狗係「熛怒之神」，會帶來唔吉利，撞到就會有衰氣。玄學家麥玲玲話仲有另一傳說：「指初三係老鼠招親，以前風俗放啲米在牆角，等佢招親開心啲，唔好打擾佢，所以大家都早啲瞓覺。所以傳統好少去拜年，去祈福會多少少。」


為避是非黑運，玲玲師傅決定今日唔拜年，留喺屋企，教吓大家狗年點趨吉避凶。麥玲玲家住港島區逾千呎豪宅，坐擁無敵海景，而佢家中特別擺放咗好蘭花，咁究竟狗年屋企邊個方位可以催旺桃花，財位又喺邊度？放乜嘢可以減少病星同是非，如果想子女讀書運好啲又可以擺啲乜呢？玲玲師傅逐一講解：


【西北方位】
麥玲玲話你知：今年桃花位喺西北面，想要桃花就放多少少蘭花或鮮花都得；如果係單身或者好急住要桃花，就可以用盤加水載住浮起嘅花，都會快啲有桃花。唔想要桃花嘅朋友，呢個位就放多少少石頭類嘅嘢，因為桃花屬水，例如放石春就可以將佢沉澱，但桃花少咗，亦好容易影響人際關係，所以唔好減得太低。


【正西、正北】
麥玲玲話你知：狗年嘅病星喺北面同西面。香港有好多屋都係南北向，或東西向，所以好多門口或露台都會機會掂到西北，如果門口位置就唔好放咁多紅色嘅地毯，因為病星係屬土，紅色會再生旺病星，一定要放啲淺色地氈。另外，亦可以放一個銅或白玉葫蘆，亦可化病星。不過就盡量唔好郁動啲嘢，例如養咗缸魚，郁咗可能會強化咗佢，咁就冇咁好。


【東北】
麥玲玲話你知：怕是非，大嘅就惹官非，今年東北位置要提防，盡量唔好放綠色，放一啲紅色嘅擺件，包括紅色嘅燈或擺設可以化是非口舌。


【東南】
麥玲玲話你知：至於東南位財位，就放多啲象徵財運嘅嘢，包括財神、水晶，金飾都得，或放一盤植物都可以助旺財運。


【正南】
麥玲玲話你知：正南，想讀書考試好同升職嘅朋友多數都放富貴竹，而近年就流行日本蕙蘭，都係一支支向上，代表節節上升。甚至可以將書枱搬去正南位置，喺正南位用電腦都有助事業運。


【中間】
麥玲玲話你知：狗年想添丁，或者拍咗好耐拖想開花結果嘅朋友，今年喺屋嘅中間，喜慶呢個位置，可以放果實類植物，例如五代同堂，過年後放辣椒都可以。再唔係擺一盞紅色物品，或者代表喜慶嘅燈籠都有助添丁，或喜事嘅運。



麥玲玲教大家狗年屋企邊個方位擺咩最好。(攝影﹕林賓尼)玲玲姐經常都笑口常開。
千呎大屋，佈置都係以簡潔為主。玲玲姐屋企嘅西北位放兩棵蘭花，有助增強人緣及桃花。麥玲玲嘅屋企有無敵海景，但佢提醒今年北面同西面都係病星位，可放白玉葫蘆化解。
如果想結婚嘅朋友，今年喺屋嘅中間可以放五代同堂。東南面係財位，放多財神、水晶，金飾都好有利。用盤加水載住浮起嘅花，可增強桃花運。