混血名模Ana R.同師妹Jessica C.（JC）私底下情同姊妹，兩人已為人妻，家庭美滿，仲分別生咗囡囡Maya同Tessa，踏入狗年，佢哋正式宣佈同時陀B嘅喜訊！認真值得恭喜！
為迎接狗年同兩位狗年BB，佢哋就帶同寶貝狗女Gucci同Charlie同大家拜年，並分享佢哋再度懷孕嘅喜悅，BB生肖屬狗，佢哋都覺得好funny，仲希望BB似狗仔咁忠誠同有活力，問到新年願望，佢哋都異口同聲話：「希望順利生產，身體健康。」
回顧去年嘅難忘事，Jessica就話同安志杰結婚，係一生中難忘，JC話：「沒有預計婚禮是這麼amazing，所有人都在那裏，由懷孕、結婚到第二個BB，一件事比一件事好，時間過得很快，Andy努力工作，而我亦會將優先放在小朋友身上。」
懷孕近3個月嘅Ana就話今胎嚟得意外又驚喜，佢話：「今次真是很大的驚喜，我跟Jessica一同懷孕，其實我們都沒有家人在香港，我們就像姊妹，有人說好姊妹無論結婚、生小孩都會很接近，上次我的Maya比她的Tessa早4個月，今次她的BB比我的早3星期，對我來說兩個已經比足夠還多了。」不過JC就話希望生夠3個，而佢哋都話希望家庭同工作取得平衡，繼續成為事業型女性，畀小朋友一個好榜樣。
JC同Ana兩個都係愛狗之人，提到有唔少人因為懷孕就藉口棄養寵物，Ana家中有三隻狗女、包括17歲半嘅Gucci、9歲嘅Angel、同4歲狼狗Lily，即將又有新成員，佢話：「其實棄養很不負責任，Maya很愛寵物，我的人生也不能沒有牠們的存在，小孩照顧寵物會學懂責任、照顧與愛。」
 Jessica C.同Ana R.兩個人感情好好！ |  Jessica C.同Ana R.希望狗年事事順利！ |  Ana R.同Jessica C.話唔會因為懷孕而棄養！ |
