李克勤喺農曆年到拉斯維加斯舉行巡唱，特登帶埋老婆同一對囝囝到美國過年，由於時差關係，克勤今年過咗兩個大年初一，佢話：「初一先喺香港同家人拜年，之後上機飛拉斯維加斯，到埗後又過多一個美國嘅年初一。初二同初三做兩場騷，冇諗過觀眾咁熱情同咁厚愛，收利是都收到手軟，仲有歌迷送美金銀紙花畀我，真係保家宅保平安，收收埋埋都夠我囝囝一、兩個月學費㗎，非常感謝。」
完騷後克勤由歌手變回廿四孝老竇，為囝囝撲飛睇Bruno Mars演唱會，克勤話：「因為兩個仔都係佢fans，好彩有貴人幫手撲到靚位飛，兩個仔睇得好開心，我就有少少失望，因為佢冇唱《Versace on the floor》，我好鍾意呢首歌，但佢跳同唱都係冇得頂，講嘢非常幽默，可以喺佢嚟香港做騷前先睹為快，都係開心。」
 克勤日前去咗美國開巡迴演唱會 |  其實克勤老婆同一對仔都有同行。 |  克勤開騷之餘，仲逗咗大堆利是。 |
