梁詠琪（GiGi）今日相約傳媒在尖沙嘴茶敍，除咗慶祝農曆新年外，仍不忘為有份演出的賀歲電影《西遊記女兒國》做宣傳。
GiGi今日紅噹噹咁現身，佢笑指農曆年放縱自己食糕點，短短幾日已經肥咗兩磅。因為農曆年前流感太厲害，所以冇俾愛女Sofia返興趣班，所以佢每天都要攪盡腦汁喺屋企安排活動俾個女，好似做小手工同整蛋糕等，直至新年先至帶Sofia外出拜年兼認識新朋友，擴闊社交圈子。
GiGi話Sofia未入戲院欣賞新戲，但身邊有唔少朋友嘅仔女睇過GiGi戲中國師造型後，質疑平日友善嘅Auntie Gigi變咗壞人，GiGi要向佢哋解釋話：「Auntie GiGi就好似你哋媽咪咁有時會惡啲，但媽咪唔會係壞人，國師只係想保護國家同國王。」GiGi又話睇好多網上留言，見到有人誤以為佢條髮線真係好似造型咁高，GiGi指呢點必須要澄清：「戲中髮線係化妝，大家唔好誤會，我髮線仍然好濃密。」
GiGi透露過兩天跟丈夫帶同Sofia到新加坡玩，兼探望楊采妮等朋友，返港後便開始為5月紅館演唱會作準備。佢話演唱會內部訂購已爆滿，下月將公開發售，暫定兩場，問到會唔會加場？GiGi話：「睇吓有冇檔期，我自己就唔想加，因為純粹20年想同fans滿足喺香港開騷心願，又唔係為宣傳同造勢。」至於老公會唔會上台演出，GiGi哈哈大笑指丈夫隨時準備上台，平日喺屋企都有載歌載舞，最愛唱嘅歌係《我鍾意》。
 GiGi話自己新年食得多賀年食品，已經肥咗兩磅。 |  佢話新年帶咗囡囡外出拜年識朋友 |  |
