張寶兒(Bowie)今日到灣仔君悅酒店為《香港國際珠寶展》兼《第十九屆香港珠寶設計比賽》擔任模特兒，戴上價值超過六千萬嘅藍寶石頸鏈及戒指現身嘅Bowie接受訪問時表示，自己都係第一次戴起咁隆重嘅首飾，即刻感到有啲壓力，佢話：「戴住咁貴重嘅首飾覺得有啲Carry唔到。」
咁Bowie自己又鍾唔鍾意珠寶首飾？期待男友袁偉豪送嘛？佢話：「我自己未有特別喜好，亦唔希望佢使太多錢，我覺得心意嘅嘢煮餐飯就已經足夠，未必要用首飾去衡量。」 日前兩人被影到同屋企人食團年飯，報道更指佢哋兩個係見家長傾婚事，問到Bowie係咪好事近？佢話：「暫時未有咁嘅計劃，新一年都係希望大家專注工作，屋企人亦冇催婚。」
講到早前麥玲玲曾經批Bowie今、明兩年會好事近，Bowie自己又點睇？佢話：「我本身係基督徒，不過如果有咁嘅睇法，可能有自己嘅根據，但我哋兩個暫時真係未有計劃 。」咁如果對方向你求婚又會唔會接受？佢話：「我希望是事業上有突破先至會再諗。」
 攝影：陳俊強 |  寶兒話戴咁貴嘅首飾，覺得自己Carry唔到。 |  寶兒笑得咁開心，唔通真係好事近？ |
