今日係年初七「人日」，何超儀日前同詹瑞文、MC仁等人飛咗去冰島，拍攝教人尋找快樂嘅短片，不過大家不忘隔岸拍片祝福香港人生日快樂。短片中，超儀揀咗一座雪山做背景，再同大家一字排開，凍到震住咁同大家講恭喜，詹sir講笑話唔cut嘅話，佢哋會一直恭喜落去。問超儀喺冰島係咪好凍？佢話：「其實都ok，都係零下兩度左右，如果喺香港就凍，但喺外地無咁濕會好啲。」
另外，超儀4月5、6號喺灣仔藝術中心舉行兩場集合搖滾、投射藝術嘅演唱會，早前佢放咗一條開會片上網，攞住自己figure公仔嘅超儀，笑住話公仔條裙太短到，佢哈哈笑話:「嘩，條裙去到盤骨，露晒xx喎！」搞到大家都忍唔住笑。
講到自己再做音樂，超儀就話要多謝LMF呢班知己良朋，因為初初出道試過走音，佢放棄咗唱歌，依家會珍惜每次嘅表演。超儀說：「初初出道覺得自己唱得下，細個信心爆棚，驚都會頂，本來我都對自已好有信心，後來走音好有挫敗感，俾人話係worthless，係屎嚟嘅，有段期間放棄咗唱歌，最後遇到我嘅良朋知己LMF開解咗我做獨立音樂。」
 |  超儀曾經因為自己走音，令心情低落，好彩多得LMF一班朋友支持，MC仁係其中一個。 |
