今年4月27號就會喺旺角麥花臣場館舉行演唱會嘅劉浩龍(師兄)， 最近已經開始密密操肌為演出做好準備，早前師兄喺觀塘接受「蘋果」訪問，分享自己個備戰狀況，佢話 ：「由一月尾開始我已經喺健身教練嘅督促下密密練習，每日起碼跑八公里然後再做Gym，飲食嘅餐單上只得菜、雞胸、蛋白同魚四樣嘢揀。」
師兄話以往開演唱會嘅磅數係158磅，但希望今次可以再進一步：「我呢位教練有兩位好得意嘅徒弟，一個叫張家輝一個叫彭于晏，相信我好難超越佢哋，但我都唔可以失禮教練，一樣都要畀多啲心機。」
師兄早前已表明今次要為演出認真排舞，咁到時演唱會跳舞嘅比例會佔幾多?師兄話﹕「咁又唔會好多，事實上我只係想認真咁練一Part舞啫，因為我係一個跳舞嘅蠢材，況且適合跳舞嘅快歌亦唔多，我只想好認真咁跳一次，然後得到大家嘅掌聲我就好滿意㗎啦。」
今次演唱會講明無嘉賓環節，師兄話﹕「相信入場嘅觀眾都唔介意睇我耐啲。」而Rundown都準備得七七八八，佢話﹕「我唔會想將啲舊歌改得太犀利，希望觀眾一聽到首歌嘅前奏就有返嗰份回憶喺度。」師兄話今年除咗做演唱會亦會造新歌，喺過程中搵番好多以前初出道做歌手嘅回憶﹕「所以我同公司講，今年希望全力做音樂工作，雖然中間我要去拍電影，但我都好希望年尾可以出席頒獎禮，當然我唔係希望攞獎，只係好想去感受一吓氣氛同見歌手朋友。」
師兄預計今年共有三至四首新歌面世，故此即使到時出席頒獎禮都感到心安理得﹕「起碼去到出席都覺得自己好似係樂壇嘅一分子。」今次選址旺角麥花臣，有無諗過幾時去紅館？佢話﹕「其實無，我份人一向都好知道自己位置，我唔想人哋話『好啦，還你心願幫你開一場。』咁樣係為開而開，我希望大家真係滿意我演出，有口碑有成績我先至會再考慮。」
 師兄預計今年共有三至四首新歌面世 |  |  |
