在電視圈地位舉足輕重的汪明荃，為無綫拍過多部收視爆燈的經典劇集，包括《倚天屠龍記》、《千王之王》、《家變》、《萬水千山總是情》、《京華春夢》等，被封為無綫鎮台之寶，曾憑《婚前昏後》和《我的野蠻奶奶》兩度獲封視后。不過，由於近年無綫頻傳高層惡鬥，甚至有傳藝員變成派系鬥爭犧牲品，今年初阿姐出席台慶頒獎禮時，敢言的她就發表山頭論為藝員發聲，昨日更破禁現身敵台viuTV，為老公羅家英有份參與的節目打氣。
ViuTV全新大型遊戲節目《Good Night Show全民星戰》昨在邵氏影城錄影，主持人包括梁漢文、林敏驄、黃心美等，嘉賓是羅家英和李子雄，昨日ViuTV安排記者到錄影廠探班，赫然見到阿姐陪老公羅家英現身。由於早前家英哥才做白內障手術，問到阿姐是否擔心老公才做「跟得夫人」？家英哥就解釋因為阿姐胞弟夫婦由美國返港，他們在活動前一齊飲茶，之後就說：「不如去睇吓羅家英」，所以造就阿姐大駕光臨敵台ViuTV活動。
婉拒訪問
身為無綫鎮台之寶的阿姐，大方在錄影廠內任記者拍照，不過由於「方丈份人好小器」，阿姐亦識造婉拒記者訪問要求：「唔好啦，你哋講啦。」但反斗的林敏驄卻整蠱阿姐，不停出手欲將ViuTV貼紙黐在阿姐身上，事後問阿驄怕阿姐嬲嗎？他說：「怕乜呀？我哋識咗八十幾年。」家英哥亦不擔心阿姐被影響：「阿驄呢啲低B嘢，點會影響到人吖？睬佢都儍！佢係人都玩，唔分大細，所以都由得佢。」李子雄亦補充說：「知阿驄係冇惡意嘅。」
阿姐大方讓傳媒拍照後離去，家英哥錄影後再接受訪問，對於阿姐突然踩場，他笑說：「今日發生咗少少意外，突然之間有個人嚟探班，嗰個人就係羅汪明荃，佢係某公司嘅高層，驚某公司會問點解佢會嚟探班。其實今次係以羅太嘅身份，亦都係以明星足球隊名譽會員嘅身份嚟扮班，冇乜問題吖！佢又冇做訪問，只係影張相啫，加上係一家人，佢細佬喺美國返嚟，我好少喺香港上節目，佢嚟探班同我打氣囉！」
探班打氣
問到會否擔心無綫小器？家英哥夭潤說：「唔講呢個喇，我唔講無綫。咁或者佢唔小器呢，係我哋驚啫。」家英認為演藝界要和和氣氣，百花齊放：「你幫吓我，我幫吓你，冇乜問題吖。」
此外，家英哥透露會跟阿姐到俄羅斯睇世界盃：「佢鍾意睇我踢波，試過佢睇我踢波時，問我點解唔用腳踢，要用手？其實係因為我擲界外球；佢以前鍾意同施南生打羽毛球，O依家鍾意跳舞、健身、行路。」
