今日係「哥哥」張國榮（Leslie）逝世15周年，其歌迷組織「悅榮軒」喺晚上6點左右，喺中環愛丁堡廣場舉行懷念張國榮嘅燭光活動，台上嘅橫額寫上「永遠寵愛張國榮」，現場大概有300人拎住一點燭光，一齊大合唱去懷緬哥哥，期間有粉絲忍唔住落淚，悅榮軒陳小姐喺台上話：「時光流轉，匆匆已經15年，期間我哋舉辦過唔同嘅活動，去重溫Leslie嘅歌聲魅影，呢15年見證咗時光變幻，大家嘅成長，我哋都通過Leslie去了解同欣賞呢個世界，不過係時候回歸初心，從明年開始，悅榮軒不再主辦紀念Leslie嘅燭光活動，but love never end，我哋依然會記得Leslie嘅精神，每個光影、佢嘅完美主義，同埋真善美，都係喺我哋心目中。」6點43分，所有粉絲低頭，默衷一分鐘，有粉絲忍唔住喊。之後，大會播出張國榮嘅聲帶：「多謝你哋，希望你哋永遠記得起我。」
事後陳小姐表示15年係一個折點，係一個好時機，讓大家回歸初心：「係朋友之間嘅聚會，一齊懷緬哥哥，亦都日漸壯大，不過我哋希望有番懷緬嘅私人時間同空間，呢15年已經達到目的，哥哥係一個人盡皆知嘅大明星，所有有華人嘅地方都知道張國榮，希望以後以私人空間、私人方式去懷緬。」
 （攝影：陳俊強） |  今晚「悅榮軒」在中環愛丁堡廣場舉行悼念哥哥的活動 |  約300哥迷以一點燭光悼念偶像 |
 |  有唔少人忍唔住喊 |  互相擁抱安慰嘅都有 |
 陳小姐表示明年起會停止主辦，以各人嘅方式去懷念哥哥。 |
