周杰倫喺上星期喺香港開完十場演唱會，之後同老婆昆凌喺尖沙嘴食咗個海景晚餐，以為佢過得好輕鬆？No la…
事緣大陸音樂平台「網易雲音樂」噚日午夜12點前，推出咗一個叫做「周杰倫熱門歌曲」合輯，仲喺凌晨1點45分左右通知用戶可以上去買嚟聽，售價係400蚊人民幣（約499港元），聲稱合輯包含200首周杰倫嘅歌，不過呢個合輯只係賣咗7個鐘就落咗架，原因係網易雲音樂冇呢啲歌曲嘅版權。
早喺二月初，網易雲音樂已經將大陸音樂比賽節目《偶像練習生》中，比賽選手翻唱周杰倫《半獸人》嘅版本放上網賣，呢次售賣已經引起咗周杰倫經理人公司杰威爾音樂嘅不滿，擾攘咗近一個月，杰威爾音樂決定喺3月31日午夜，回收所有旗下藝人嘅音樂版權，包括所有周杰倫嘅歌。
有份買到「周杰倫熱門歌曲」合輯嘅歌迷，最終只係聽咗一陣就冇得再聽周杰倫嘅歌，又批評網易雲音樂明知喺冇版權嘅情況之下賣歌好厚面皮，之後又話係要刪app泄憤。而根據歌迷嘅圖片，呢個合輯最少賣出咗102,299次，計返條數，即係已經賺咗4,091萬人仔。(約5,109萬港元)
至於網易雲音樂就喺下午6點左右，發聲明道歉，指公司喺3月31號晚上23:59之前都仲有周杰倫歌曲版權，原意係想喺仲有版權前賣歌，不過程序出錯所以喺冇版權下賣多咗7個鐘，目前就傾緊有冇得重新上架，同時會退返全數金額俾買咗嘅歌迷。
等等先…今日4月1日…會唔會係愚人節節目嚟㗎？
 |  「網易雲音樂」今日凌晨發售咗一個叫做「周杰倫熱門歌曲」合輯，售價係400元人仔。（互聯網圖片） |  喺明知失去版權嘅情況下，網易雲音樂暗示用家要「把握機會」。（互聯網圖片） |
 |  更加喺凌晨1點左右叫人去買，但根據道歉聲明，呢個時候已經冇版權。 |  |
