今日係林子善同老婆董佩欣補擺喜酒嘅日子，一班星級兄弟團喺今朝已經同新郎哥去到將軍澳皇冠假日酒店接新娘。（新聞連結：https://bit.ly/2IoxhQ8
）
下午大約6點15分，一班兄弟姊妹團聯同一對新人喺酒席開始前接受傳媒訪問。
身為兄弟團之一嘅馬國明被指係千杯不醉，佢話：「係千杯茶不醉啫。」喺身旁嘅唐詩詠就話：「我見識過，佢冇底㗎，都唔知佢可以飲到幾多，我醉佢都未醉。」馬明笑言：「我諗呢一世都冇人知我可以飲到幾多杯。」
講到今朝姊妹團非常之咁善待一班星級兄弟團，身為「兄弟」之一嘅唐詩詠就話：「可能我哋叻啦，我就負責做指揮，派啱啲人選去負責唔同嘅項目，不過今晚有啲嘉賓好難控制，好似阿Bob咁，佢已經send咗massage嚟叫大家小心啲，話要隊冧晒我哋，所以我今晚都會派專人睇住佢。」
唐詩詠話自己今次係第一次做兄弟，如果將來到呢班兄弟結婚嘅話就識規矩，仲話將來如果結婚就輪到佢哋幫手做「姊妹團」，身邊嘅馬明聽到結婚就話：「我？可能十年八年後啦。」而馬國明嘅女朋友黃心穎今晚都會出席，問到佢怕唔怕被人催婚？馬明話：「唔會啦，都係嚟飲啫。」
 攝影：葉君海 |  身為兄弟團之一嘅馬國明被指係千杯不醉。 |  身旁嘅唐詩詠就話：「我見識過，佢無底㗎，都唔知佢可以飲到幾多。」 |
 唐詩詠話自己今次係第一次做兄弟，如果將來到呢班兄弟結婚嘅話就識規矩。 |  唐詩詠仲話將來如果結婚就輪到佢哋幫手做「姊妹團」。 |
