吳鎮宇去年憑電影《脫皮爸爸》角逐第36屆金像獎最佳男主角，雖然未能成功封帝，但戲中演繹八十幾歲，患有老人痴呆症老爸，為婚姻事業失敗嘅仔，而不斷脫皮回春到得十幾歲，同阿仔重溫自己不同階段經歷作為鼓勵，一人分演六個角色，雖然個別造型有靠特技化妝，但鎮宇嘅演技，令每個年齡層都演得有說服力。
鎮宇日前於九龍灣宣傳《脫皮爸爸》，佢第一句就話唔好覺得分飾六角係一件偉大嘅事，其實背後最偉大付出，係承受特技老人妝對皮膚的傷害，鎮宇話：「我記得電影《楢山節考》中有位女明星，為咗角色自己預先打甩兩隻門牙，呢份情操我未必做到。」
怎能由十幾歲至八十幾歲的六個不同階段演得有說服力？鎮宇解釋，將角色六個時期代入香港六個大時代：「八十幾歲老人痴呆時，就接近香港近年咁，成日只記得以前嘅事，最近嘅嘢唔記得；六十幾歲退休時，就有種固執，成日恃老賣老；五十幾歲時，就係迷惘期，好似九七時嘅港人心景，再倒數上前就係杜老誌紙醉金迷年代，o依家黃色事業都係即時解決，當年要慢慢成為朋友先有得傾。」用年代背景代入角色，鎮宇覺得有助演繹，若果將來分享演繹心得，都可以用呢個作例子。
戲中同古天樂演兩父子，鎮宇話感覺就好似自己突然有個已經成年嘅仔咁，諗番以前，若果自己似古仔咁大時，都好想有機會同自己爸爸有戲中嘅父子情經歷，例如一齊坐球場睇波食菠蘿冰。
電影上映時，古仔同鎮宇都係影帝級人馬，不過鎮宇話影帝個名冇咩用：「觀眾唔會理，好多戲都標榜雙影帝，甚至五影帝都有，咪死得仲慘，無乜用。」對於奇幻電影票房，鎮宇覺得反而會有利，佢話：「我哋文化中少有，全靠導演去將奇幻世界打造出嚟，唔似愛情片有一男一女就可以。」
 吳鎮宇喺電影《脫皮爸爸》入面，最大犧牲嘅係要承受多次特技化妝。 |  由八十幾歲開始倒退，陪古天樂再次經歷一次父子情。 |  |
