憑大台劇《潛行狙擊》扮演「爆燈」及電影《喜愛夜蒲》上位嘅沈震軒，曾經同賈曉晨、林峯舊愛劉羽琪等傳緋聞，3年前傳因形象花弗被掟入「雪櫃」，前年離開大台後另覓出路，轉做唱作歌手闖樂壇。今日佢喺社交網晒支票，原來3首歌嘅創作費僅得$7,500，睇到真係慨嘆音樂何價格，難怪咁多歌手話音樂搵唔到食！
沈震軒唔介意公開自己嘅創作收入，留言：「第一次收到一張來自我創作的歌曲《打不死》《我很好》和《我真的很好》的支票。雖然做音樂的確收入很少。但是這一份作為創作人的鼓舞是我第一次經歷和感受到。真的很激動。我承諾會繼續做更多屬於沈震軒的歌曲。」
睇真啲，沈震軒作曲嘅《打不死》同《我很好》各收$1,500；而由包辦曲詞嘅國語歌《我真的很好》就有$4,500，有網民突破盲腸：「原來國語比粵語貴，難怪了」、「真的想像不到是這麽低的」。
 沈震軒公開作曲收入,3首歌僅得$7,500。(網上圖片) |  沈震軒由喜愛夜蒲轉形做唱作歌手(網上圖片) |  許志安開騷搵過沈震軒做嘉賓(網上圖片) |
