武俠小說大師金庸嘅名著之一《倚天屠龍記》曾多次拍完又拍，單單電視劇嘅版本就已經有7次咁多。最近，內地就開拍第8版嘅《倚天》，劇中男女主角都起用較年輕演員，而且個個都係高顏值，唔計演技，只睇樣都已經夠晒好睇！
《倚天屠龍記》各個角色 顏值爆分
21歲小鮮肉 曾舜晞 飾張無忌
先睇睇男主角張無忌，由21歲嘅曾舜晞出演，佢2014年時於內地以組合Fresh極客少年團出道，但翌年10月退出單飛，期後在綜藝、音樂、影視各方面都有活動。雖然《倚天屠龍記》並唔係佢第一套接拍嘅電視劇，但年紀輕輕就咁快做到男主角，真係要睇過先知佢嘅演技如何。
曾舜晞飾演張無忌。
據消息指，主角張無忌一角早前就有小鮮肉胡一天﹑牛駿峰等曾試鏡角逐，但最終都由曾舜晞出演。可惜有網友認為佢沒有武俠嘅感覺，覺得佢唔適合擔大旗做男主角。
嶄露頭角 陳鈺琪 飾趙敏
內地女演員陳鈺琪現年只有20歲，為唐嫣旗下藝人，2016年先開始拍劇，早年憑電視劇《錦繡未央》中飾演九公主「拓跋迪」而備受注目。今次佢喺《倚天屠龍記》入面擔正做趙敏一角，大家感覺如何呢？
陳鈺琪飾演趙敏。
樣子清秀可愛嘅陳鈺琪，唔少觀眾對佢做女主角就好有信心，唔知要演活一位活潑又帶點霸氣嘅郡主，對演員資歷尚淺嘅佢會唔會有難度呢？
一鳴驚人 祝緒丹 飾周芷若
另一位重要女主角周芷若，則由今年26歲嘅祝緒丹出演。由雜誌模特兒出身，2013年首次演出電視劇，祝緒丹曾拍攝古裝仙俠電視劇《三生三世十里桃花》演玄女一角、都市職場電視劇《談判官》等劇而較為人所認知。今次擔任《倚天屠龍記》中的女主角之一，相信會係一個新挑戰。
祝緒丹飾演周芷若。
要做到外表帶幾分冷艷、亦正亦邪嘅周芷若，未知祝緒丹表現如何？
突破演技 曹曦月 飾殷離
曹曦月係內地新生代演員，今年24歲，自2013年起開始參與拍攝電視劇，佢拍過嘅電視劇較為人所認知嘅，就例如有《楚喬傳》同《浪花一朵朵》等。
曹曦月飾演殷離。
香港藝員參與演出
「少女標本」成員 許雅婷 飾小昭
今次第8版嘅《倚天屠龍記》，亦都有搵嚟香港嘅藝員參與拍攝，而香港女團「少女標本」成員許雅婷就係其中一個。之前都有拍過電視同電影嘅佢，今次就喺新《倚》中飾演女主角之一嘅小昭，唔知佢會有點樣嘅表現呢？
許雅婷飾演小昭。
那些年芷若 周海媚 飾滅絕師太
而第二位有份拍攝新《倚天》嘅女演員就係美魔女周海媚！51歲嘅「海味」多年演出經驗無數，更早喺94年馬景濤主演嘅台灣版《倚天》演過女角周芷若，24年後就升呢扮演高手之一嘅滅絕師太。雖然角色設定比較年老，不過周海媚美貌依然出眾，不比一班90後妹妹遜色！
周海媚飾演滅絕師太。
而其餘有份參與《倚天》嘅演員就仲有以下呢幾位：
孫安可飾演楊不悔。
陳欣予飾演殷素素。
楊明娜飾演金花婆婆。
