減肚腩又養顏！簡單又便宜的「SOS七日排毒瘦身食譜」，德國女作家親身試驗，7日減達4.5KG！
相信唔少香港女性都受到大肚腩同暗瘡影響，平日工作咁繁忙、加上經常食出面又油又肥嘅食物，結果養出個大肚腩，皮膚亦暗瘡生不停～
德國著名作者卡塔琳娜巴赫曼同老公之前深受肥胖影響，直到佢地嘗試由K.S.醫生推介嘅「SOS七日熱帶排毒瘦身食譜」，唔駛做運動，頭一個禮拜就減咗4.5KG，三個月減咗11KG，之後更減去17KG，效果非常好！而且呢本書於2015年推出時就登上「德國亞馬遜健康醫療類排行榜」第一名，有明星同部落格主都有推薦過㗎～
首先，進行呢個減肥計劃有以下兩個重點：第一，剛起身要飲一杯暖水，全日都可飲水（有氣水不可）、茶及黑咖啡（不可以加任何調味，如覺得口淡可加檸檬汁）；
第二，肚餓時可食奇亞籽膠，每日最多可食4大匙。奇亞籽膠可以自己喺屋企整定：
- 將兩大匙奇亞籽與兩百毫升的常溫水加入可密封的玻璃容器中（不可用塑膠碗）
- 充分攪拌後，將容器密封住
- 靜置十五分鐘即成
Day 1 水果日
第1日要排清身體毒素的開始，可以令身體為接下來嘅減肥計劃做準備。呢一日除香蕉外，所有水果都可以任食，特別係瓜類如西瓜等，可加強減重效果。
Day 2 蔬菜日
第2日為身體補充天然油脂同營養，可同時改善皮膚及頭髮。呢一日可以食任可蔬菜包括澱粉類蔬菜如土豆、蕃薯等，而早餐要以碳水化合物為主，可食土豆或蕃薯，烹調方法冇限定，但最好能配搭天然油脂如橄欖油、少少牛油、椰子油等等。早餐後則要全日食蔬菜，可將不同種類蔬菜混合做沙律、水煮、烘焗、炒等。
Day 3 水果＋蔬菜日
第3日可任食所有種類嘅水果同蔬菜，除香蕉及澱粉類蔬菜如土豆、蕃薯等，因水果已經可提供足夠碳水化合物，再食澱粉類蔬菜會有反效果！
而此時你身體會開始燃燒脂肪，可能會令你有進食慾望，但千萬要忍住口，別讓前功盡廢！
Day 4 香蕉、植物奶及蔬菜湯日
第4日只可以食最多8條香蕉、3杯植物奶同任食蔬菜湯。香蕉含豐富鉀同鎂，可補充前三日流失嘅礦物質；植物奶則補充蛋白質，可選擇飲杏仁奶、燕麥奶、或藜麥奶！
蔬菜湯就要自己喺屋企煮定一大鍋，一肚餓就可以食，並唔限時限量。
材料：2個青椒、2棵羽衣甘藍（可以菠菜代替）、3條半芹菜、6個洋蔥、9個蕃茄、適量青菜
做法：
- 所有材料切洗淨及切塊
- 準備一隻大湯鍋，倒入一公升的水
- 加入所有材料，大火煮滾後，轉中火煮約二十分鐘。
- 加入天然香料、胡椒、鹽等調味。飲唔完嘅湯要放冰箱冷藏，但唔可以放超過兩日
Day 5 蕃茄及牛肉日（牛肉可用雞胸肉、魚或豆腐代替）
嚟到第5日要補充鐵質同蛋白質，你要食2份牛肉（可用雞胸肉或魚代替，必須去皮，素食煮可以豆腐代替），每份約280克，如你唔多鍾意食肉則可以減少肉量，但注意呢日你一定要食夠6個蕃茄，而且必須要熟蕃茄（水煮、焗烤、煎都得），同埋要比平日飲多1公升嘅水，以排走身體多餘嘅尿酸。
你可以將肉類混搭蕃茄食用，如蕃茄炒牛肉，但煮食油不限量但必須天然，如椰子油、橄欖油，調味亦可加一點烤肉醬。
Day 6 牛肉及蔬菜日（牛肉可用雞胸肉、魚或豆腐代替）
第6日食譜同前一日差唔多，你可以無限制地吃瘦牛肉（可用雞胸肉或魚代替，必須去皮，素食煮可以豆腐代替）和所有蔬菜，同樣烹調方式不限但煮食油及調味料必須天然。呢一日你會發現體重有明顯下降～
Day 7 糙米、蔬菜及果汁日
第7日為排毒計劃尾聲，此時你身體毒素已經被排出很多，並有效清理腸胃和整個消化系統。
呢日你可以無限制食糙米、果汁及蔬菜，但唔可以食白米！唔鍾意食糙米可剔除，只飲果汁同食蔬菜。
排毒果汁做法：
材料：4小球甜菜根、6條中size紅蘿蔔、1個蘋果
將所有材料洗淨切好後放入果汁機攪拌好，在杯子中加入幾滴初榨橄欖油或椰子油，再將攪拌好嘅果汁倒入，輕輕攪勻即可。
一連7日嘅排毒計劃完成，若你想更瘦，可以間斷地重覆呢一個計劃，直到減至理想體重！呢個計劃唔止係以減肥為主，佢對排毒、調整消化系統亦非常有效，腸胃健康肚腩自然消失！
